University of South Wales logo

Ardal Gynghori

  1. Unilife
  2. Advice Zone
  3. Ardal Gynghori
  4. A-Y
  5. Adferiad yn Ystod Blwyddyn (IYR)

Adferiad yn Ystod Blwyddyn (IYR)

Mae ‘adferiad yn ystod blwyddyn’ (IYR) yn broses sydd, mewn rhai amgylchiadau, yn galluogi myfyriwr i gywiro ei farc methu gan gyflwyno asesiad wedi’i ddiweddaru o fewn 10 diwrnod o dderbyn y marc cychwynnol.

  • Nid yw pob asesiad yn gymwys ar gyfer IYR – gofynnwch i’ch tiwtor modiwl.
  • Y nifer uchaf o weithiau y gall myfyriwr ddefnyddio IYR yw dwywaith ym mhob blwyddyn o'u cwrs.
  • Mae IYR yn wahanol i'r dull ailsefyll arferol lle byddwch yn cyflwyno darn newydd o waith yn ystod y cyfnod ailsefyll, yn yr haf fel arfer.

Sut i hawlio IYR

Ar gyfer asesiadau cymwys, bydd IYR ar gael pan fyddwch wedi cyflwyno gwaith dilys a phriodol y cawsoch farc amdano sy'n is na'r marc pasio ar gyfer yr asesiad hwnnw. Nid yw IYR ar gael ar gyfer rhai nad ydynt yn cael eu cyflwyno, hy, nid yw ar gael os na wnaethoch gyflwyno'r asesiad o gwbl y tro cyntaf.

Dilynwch y camau canlynol:

  1. Gofynnwch i arweinydd eich modiwl a yw'r asesiad yn gymwys ar gyfer IYR.
  2. Rhowch wybod i arweinydd eich modiwl eich bod am wneud ymgais IYR.
  3. Darllenwch drwy'r adborth ar eich asesiad gwreiddiol yn ofalus, gan nodi lle mae angen i chi wella eich gwaith. Trafodwch gydag arweinydd eich modiwl os oes angen.
  4. Gwnewch y newidiadau angenrheidiol i'ch gwaith. Dylai eich cyflwyniad IYR gael ‘Track Changes’ wedi'u galluogi, fel bod y person sy'n marcio'r gwaith yn gallu gweld yn glir pa newidiadau / gwelliannau sydd wedi'u gwneud fel ymateb i'r adborth. Gweler ‘Track Changes’ yn Word. Os nad yw'n bosibl defnyddio ‘Track Changes’ oherwydd fformat y cyflwyniad, rhaid i chi gynnwys crynodeb o'r newidiadau a wnaed.
  5. Bydd arweinydd eich modiwl yn eich cynghori sut/ble i gyflwyno'r fersiwn newydd o'ch gwaith.
  6. Rhaid gwneud cyflwyniadau IYR o fewn 10 diwrnod gwaith o dderbyn y marc a'r adborth ar gyfer y gwaith a gyflwynwyd yn wreiddiol.

Sylwer:

  • Dim ond unwaith y gallwch ddefnyddio IYR ar unrhyw asesiad penodol.
  • Gallwch ddefnyddio IYR ddwywaith ar y mwyaf fesul lefel cwrs.
  • Bydd eich marc yn dilyn ymgais IYR yn cael ei gapio ar y marc pasio ar gyfer yr asesiad hwnnw.
  • Ni fydd unrhyw waith a gyflwynir ar ôl y terfyn amser o 10 diwrnod yn cael ei dderbyn.
  • Nid yw'r cyfnod gras o bum niwrnod (gweler adrannau 76-78 o’r Rheoliadau ar gyfer Cyrsiau a Addysgir) yn berthnasol i ail-gyflwyniadau IYR.
  • Nid yw Amgylchiadau Esgusodol (ECs) yn berthnasol i IYR, gan mai’r un asesiad yw e.
  • Os oedd gennych ECs ar gyfer cyflwyniad gwreiddiol yr asesiad, yna ni allwch ymestyn y ECs i gynnwys yr IYR.

Cwestiynau Cyffredin

Beth ddylwn ei ystyried wrth benderfynu a ddylwn i ddefnyddio un o’m cyfleoedd IYR?

  • Eich dewis chi yw cymryd cyfle IYR, ac yn lle hynny gallwch ddewis cyflwyno aseiniad newydd yn ystod cyfnod ailsefyll.
  • Meddyliwch am y flwyddyn gyfan o asesiadau - a oes gennych amser i wella'r darn a fethwyd cyn terfynau amser ar gyfer asesiadau eraill? Ystyriwch bwysoliad yr asesiad a fethwyd, pa mor bwysig ydy e?
  • Dim ond unwaith y gallwch ddefnyddio IYR ar yr un asesiad mewn modiwl, ond gallwch chi gymryd y ddau IYR yn yr un modiwl ar ddau asesiad gwahanol.
  • Os ydych yn penderfynu defnyddio IYR, cofiwch ddarllen yn ofalus yr adborth a gawsoch ar gyfer y cyflwyniad gwreiddiol gan y bydd hyn yn rhoi arweiniad i chi ar feysydd lle mae angen i chi wella'r gwaith. Os oes angen eglurhad arnoch ar unrhyw bwyntiau a godwyd yn yr adborth, gwnewch yn siŵr eich bod yn siarad â'ch tiwtor.
  • Os nad ydych yn gwneud IYR, mae’n bosib y bydd cyfle i chi ailgyflwyno yn ystod y cyfnod ailgyflwyno/ailsefyll ym mis Awst yn lle. Gall hyn fod sawl mis ar ôl i chi gwblhau’r darn gwreiddiol o waith ac felly efallai na fydd y cynnwys yn ffres yn eich meddwl, gan wneud pethau’n anos. Yn ogystal, mae'r cyfnod hwn ar adeg pan allech chi fel arall fod ar wyliau o'r brifysgol.

Pa fathau o asesiadau sy'n cael eu cynnwys yn yr IYR?

  • Mae IYR yn berthnasol i asesiadau gwaith cwrs, er na fydd rhai asesiadau yn gymwys naill ai oherwydd y math o asesiad neu amseriad yr asesiad, felly gwiriwch gyda’ch tiwtor a yw'r asesiad yn gymwys ar gyfer IYR.
  • Mae eithriadau yn cynnwys traethodau hir, efelychiadau, a phrosiectau blwyddyn olaf. Nid yw IYR yn berthnasol i arholiadau na phrofion dosbarth.

Os byddaf yn methu'r IYR, fyddaf yn cael cyfle arall i basio'r asesiad?

Os byddwch yn methu’r IYR gyda llai na’r marc pasio ar gyfer yr asesiad hwnnw, efallai y cewch gyfle i ailsefyll yn ystod y cyfnod ailsefyll ond bydd yn dibynnu ar eich proffil myfyriwr cyffredinol ar ddiwedd y flwyddyn academaidd ac argymhellion y Bwrdd Asesu Dilyniant a Dyfarniad.

Canllaw fideo

Gwybodaeth bellach

Os oes gennych chi gwestiynau pellach am y broses hon, siaradwch ag Arweinydd eich Cwrs, eich tiwtoriaid modiwl neu'ch Hyfforddwr Academaidd Personol.