Mae Deddf Hawliau Dynol 1998 yn berthnasol i bob un o bedair gwlad y DU ac mae'n amddiffyn pobl traws, yn bennaf o dan yr hawl i fywyd preifat (Erthygl 8). Mae'r llysoedd wedi dehongli'r cysyniad ‘fywyd preifat' mewn ffordd eang iawn i gwmpasu, ymhlith pethau eraill, hawl person i fynegi hunaniaeth o ran rhywedd, i fyw ffordd arbennig o fyw ac i ddewis y ffordd y maent yn edrych ac yn gwisgo.
Mae hefyd yn golygu y dylai gwybodaeth bersonol (gan gynnwys cofnodion swyddogol, ffotograffau a llythyrau) gael ei chadw'n ddiogel ac na chaiff ei rhannu heb ganiatâd yr unigolyn dan sylw. Yn ogystal, mae'r hawl i breifatrwydd yn nodi, oni bai bod awdurdod cyhoeddus yn gweithredu'n unol â'r gyfraith, na ddylai awdurdod cyhoeddus ymyrryd os yw person yn arfer ei hawl i fywyd preifat.
Mae Erthygl 3 yn rhoi hawl i ryddid rhag artaith a thriniaeth annynol neu ddiraddiol. Gall gael ei ddefnyddio i atal person traws rhag cael ei drin mewn modd diraddiol, er enghraifft, ei eithrio o gyfleusterau sy'n briodol i'w rhyw.